آئن سٹائن کا نایاب خط: محبت میں گرفتار ہونے کا الزام کششِ ثقل کو نہ دیں

جولائی 1933ء میں امریکی صحافی فرینک وول کو شہرۂ آفاق ماہرِ طبیعیات البرٹ آئن سٹائن کی جانب سے تحریر کردہ ایک دلچسپ اور تاریخی خط موصول ہوا، جو محبت اور قانونِ کششِ ثقل (Gravity) کے باہمی تعلق کے بارے میں پوچھے گئے ایک عجیب و غریب سوال کے جواب میں لکھا گیا تھا۔ ‘سائیکالوجی ٹوڈے’ کی رپورٹ کے مطابق ‘لانگ آئی لینڈ ڈیلی اسٹار’ کے نمائندے فرینک وول نے بیلجیئم میں قیام کے دوران آئن سٹائن کو خط لکھ کر پوچھا تھا کہ کیا انسان کا محبت میں گرفتار ہونا یا نادانیاں کرنا زمین کی کششِ ثقل کے باعث اس کے سطحِ زمین پر کھڑے ہونے کے انداز سے جڑا ہوا ہے؟

نظریۂ اضافیت کے خالق البرٹ آئن سٹائن نے اس سوال کا نہایت ظریفانہ اور دانشمندانہ جواب دیتے ہوئے تحریر کیا: “محبت میں گرفتار ہونا ہرگز انسان کی جانب سے کی جانے والی سب سے بڑی حماقت نہیں، لیکن اس کی ذمہ داری کششِ ثقل (گرئیوٹی) پر عائد نہیں کی جا سکتی۔” آئن سٹائن کے اس ایک جملے نے طبیعیات کے قوانین اور انسانی جذبات کی پیچیدگی کے درمیان فرق کو واضح کر دیا اور یہ ان کا مشہور ترین اقتباس بن گیا۔ یہ خط ایک ایسے دور میں سامنے آیا تھا جب پہلی اور دوسری عالمی جنگ کے درمیانی عرصے میں امریکا میں روایتی خاندانی اقدار کے مقابلے میں رومانوی محبت اور جذباتی تعلقات پر شدید سماجی و ثقافتی بحث جاری تھی۔