عوام سے رابطے، مسائل سننا اور حل کرنا منتخب نمائندوں کی بنیادی ذمہ داری ہے: شرجیل میمن

سندھ کے سینئر وزیر اور صوبائی وزیر اطلاعات شرجیل انعام میمن نے کہا ہے کہ عوام سے مسلسل رابطہ برقرار رکھنا، ان کے مسائل سننا اور ان کے فوری حل کے لیے عملی اقدامات کرنا ہر منتخب نمائندے کی بنیادی اور آئینی ذمہ داری ہے۔ اپنے حلقہ انتخاب کے عوام اور معززین کے اعزاز میں دیے گئے ایک پروقار عشائیے سے خطاب کرتے ہوئے انہوں نے یقین دہانی کرائی کہ عوامی مسائل کے ازالے کے لیے متعلقہ اداروں سے قریبی رابطہ قائم کر کے مؤثر اقدامات کو یقینی بنایا جائے گا۔

شرجیل انعام میمن نے کہا کہ پیپلز پارٹی کی سندھ حکومت عوام کی فلاح و بہبود اور بنیادی سہولیات کی فراہمی کے لیے تمام تر وسائل بروئے کار لا رہی ہے، جس کے تحت متعدد ترقیاتی منصوبے مکمل ہو چکے ہیں اور کئی پر کام جاری ہے۔ انہوں نے واضح کیا کہ صوبائی حکومت کی ترجیحات میں سڑکوں کی تعمیر و بحالی، تعلیم، صحت، پبلک ٹرانسپورٹ، صاف پانی کی فراہمی اور نکاسیِ آب کی بہتری شامل ہے۔ ان کا مزید کہنا تھا کہ سندھ حکومت بلا تفریق شہری و دیہی علاقوں میں عوامی ضروریات کے مطابق ترقیاتی منصوبوں پر عملدرآمد جاری رکھے گی۔