نواز شریف کا نومنتخب صدر آزاد کشمیر سے رابطہ، ترقی کیلئے مل کر کام کرنے پر زور

پاکستان مسلم لیگ (ن) کے قائد میاں نواز شریف نے آزاد جموں و کشمیر کے نومنتخب صدر ڈاکٹر محمد نجیب نقی خان کو ٹیلی فون کر کے منصبِ صدارت سنبھالنے پر مبارکباد دی اور کہا ہے کہ ان کا صدرِ آزاد کشمیر منتخب ہونا خطے کی ترقی کے لیے ایک نیک شگون ہے۔ انہوں نے امید ظاہر کی کہ صدر ڈاکٹر نجیب نقی، وزیراعظم آزاد کشمیر اور صوبائی کابینہ ایک متحرک ٹیم کی صورت میں مل کر علاقے کی تعمیر و ترقی اور عوام کی فلاح و بہبود کے لیے کام کریں گے۔

میاں نواز شریف نے گفتگو کے دوران اعلان کیا کہ وہ بہت جلد وزیراعظم پاکستان شہباز شریف کے ساتھ آزاد کشمیر کا دورہ کریں گے تاکہ حکومتی وعدوں کی تکمیل اور ترقیاتی منصوبوں کی پیش رفت کا جائزہ لیا جا سکے۔ اس موقع پر صدر آزاد کشمیر ڈاکٹر محمد نجیب نقی خان نے نواز شریف کا شکریہ ادا کرتے ہوئے یقین دلایا کہ آزاد کشمیر حکومت ان کے وژن اور رہنمائی کے مطابق عوامی مسائل کے حل اور خطے کی خوشحالی کے لیے تمام تر صلاحیتیں بروئے کار لائے گی۔