‎ آزاد کشمیر کا سرکاری خدمات آن لائن منتقل کرنے کے لیے ڈیجیٹل پورٹل جلد فعال کرنے کا فیصلہ

آزاد جموں و کشمیر حکومت نے شہریوں کو درپیش مشکلات کے حل اور تمام اہم سرکاری خدمات کو آن لائن منتقل کرنے کے لیے باضابطہ ڈیجیٹل پورٹل کو جلد فعال کرنے کی کوششیں تیز کر دی ہیں۔ اس سلسلے میں وزیراعظم آزاد کشمیر افتخار گیلانی کی زیرِ صدارت ایک اہم اعلیٰ سطحی اجلاس منعقد ہوا، جس میں سیکرٹری محکمہ انفارمیشن ٹیکنالوجی و اطلاعات محمد راشد حنیف نے سرکاری ڈیجیٹل پورٹل کی تیاری، موجودہ پیش رفت اور 100 روزہ حکومتی پروگرام کے تحت جاری دیگر آئی ٹی منصوبوں پر تفصیلی بریفنگ دی۔

اجلاس کے دوران تمام سرکاری خدمات کی مرحلہ وار ڈیجیٹلائزیشن، آزاد کشمیر بھر میں انٹرنیٹ و ڈیجیٹل رسائی کی توسیع اور عوامی سہولیات کی فراہمی کے لیے آئی ٹی انفراسٹرکچر کو جدید خطوط پر استوار کرنے کے امور کا جائزہ لیا گیا۔ نئے ڈیجیٹل پورٹل کے قیام سے تمام شہریوں کو مختلف سرکاری خدمات اور محکموں سے متعلق اہم معلومات ایک ہی مرکزی آن لائن پلیٹ فارم پر میسر ہوں گی۔ سیکریٹری آئی ٹی کے مطابق اس اقدام سے عوام کو سرکاری دفاتر کے بار بار چکر لگانے سے نجات ملے گی جبکہ حکومتی امور میں شفافیت، جوابدہی اور کارکردگی میں نمایاں بہتری آئے گی۔ وزیراعظم افتخار گیلانی نے محکمہ آئی ٹی کو ہدایت کی کہ پورٹل کی حتمی تکمیل کا کام جلد از جلد نمٹایا جائے تاکہ تمام مجوزہ سہولیات بلا تاخیر عام شہریوں کی پہنچ میں آ سکیں۔