بغیر پائلٹ کے مسافر طیارے نے پہلی پرواز کامیابی سے مکمل کرلی

امریکی ہوابازی کی تاریخ میں ایک نیا سنگِ میل عبور کرتے ہوئے بغیر پائلٹ کے پرواز کرنے والے پہلے مسافر طیارے نے امریکہ بھر کا طویل سفر کامیابی سے مکمل کر لیا ہے۔ ‘جوبی ایوی ایشن’ (Joby Aviation) نامی کمپنی کے سنگل انجن ‘سیسنا کاروان’ طیارے نے ملک گیر سطح پر بغیر کسی انسانی پائلٹ کے خودکار پرواز کی آزمائش کو بغیر کسی حادثے کے سر انجام دیا ہے۔ جوبی ایوی ایشن کے بانی اور چیف ایگزیکٹو جو بین بیورٹ نے اس کامیابی پر بات کرتے ہوئے کہا کہ امریکہ بھر کا یہ تاریخی سفر دراصل جدید ہوابازی کے ایک بالکل نئے عہد کی پہلی عملی جھلک ہے۔

کمپنی کا یہ جدید طیارہ 7 ستمبر کو کیلیفورنیا سے روانہ ہوا اور اس نے امریکہ کے مختلف ریاستوں سے گزرتے ہوئے کل 3,199 میل کا طویل فاصلہ مکمل طور پر خودکار (Automated) پروگرامنگ کے ذریعے طے کیا۔ سفر کے دوران طیارے نے مقررہ روٹ کے تحت متعدد مقامات پر اسٹاپس کیے، جبکہ طیارے میں نصب آرٹیفیشل انٹیلی جنس مشین نے مسلسل سفری خطرات اور سیکیورٹی چیلنجز کی مانیٹرنگ کی اور کامیابی سے اپنی آزمائشی لینڈنگز کیں۔ جوبی ایوی ایشن کا کہنا ہے کہ خودکار پروازوں کی اس ٹیکنالوجی سے دور دراز اور پسماندہ علاقوں کو مرکزی شہروں سے جوڑنے میں مدد ملے گی اور قدرتی آفات کے موقع پر ہنگامی امدادی سامان کی ترسیل کے لیے برق رفتار ردِعمل ممکن ہو سکے گا۔