امریکا: پانچ ماہ کی سخت مشق، شہری نے کپ پلٹنے کا ریکارڈ بنا ڈالا

امریکی ریاست آئیڈاہو کے شہر بوائز سے تعلق رکھنے والے معروف ورلڈ ریکارڈ ہولڈر ڈیوڈ رش نے 10 پلاسٹک کپ پلٹنے (Flip Cup) کا نیا عالمی ریکارڈ قائم کر دیا ہے۔ 200 سے زائد گنیز ورلڈ ریکارڈز اپنے نام کرنے والے ڈیوڈ رش نے یہ کارنامہ محض 6.63 سیکنڈز میں سرانجام دے کر 7.57 سیکنڈز کا سابقہ ریکارڈ توڑ دیا۔ ڈیوڈ رش کے مطابق، اس ریکارڈ کو توڑنے کا خیال ان کے ایک ساتھی الیکس کی جانب سے ملنے والے چیلنج کے بعد پیدا ہوا۔

اگرچہ انہیں امید تھی کہ وہ چند ہفتوں کی مشق کے بعد یہ سنسنی خیز ہدف حاصل کر لیں گے، تاہم عملًا یہ تجربہ متوقع سے کہیں زیادہ دشوار ثابت ہوا۔ انہوں نے بتایا کہ کپوں کو مسلسل اس زاویے سے پلٹنا کہ ہر کپ میز پر بالکل سیدھا اور درست پوزیشن میں گرے، انتہائی سخت تکنیک کا تقاضا کرتا ہے۔ کئی ہفتوں کی مسلسل مشق کے بعد ان کی کامیابی کی شرح 50 فیصد تک پہنچی، لیکن ریاضیاتی حساب سے 10 کپوں کو لگاتار درست لینڈ کرانے کے لیے ہر 1,000 میں سے صرف 1 کوشش کامیاب ہونے کا امکان تھا۔ بالآخر 5 ماہ کی انتھک مشق اور سینکڑوں کوششوں کے بعد ڈیوڈ رش یہ تاریخی گنیز ورلڈ ریکارڈ اپنے نام کرنے میں کامیاب ہو گئے۔