واٹس ایپ صارفین کیلئے خوشخبری، نیا وائس ٹو ٹیکسٹ فیچر متعارف کرانے کی تیاری

پیغام رسانی کی مقبول ترین ایپلیکیشن ‘واٹس ایپ’ (WhatsApp) اپنے اینڈرائیڈ صارفین کے لیے ایک نیا اور آسان ‘وائس ٹو ٹیکسٹ’ (Voice-to-Text) فیچر تیار کر رہی ہے، جس کے تحت صارفین آڈیو ریکارڈنگ کے بجائے اپنے پیغامات بول کر ڈکٹیٹ کروائیں گے اور وہ تحریری متن کی صورت میں بھیجے جا سکیں گے۔ واٹس ایپ کی اپ ڈیٹس پر نظر رکھنے والی ویب سائٹ ‘واٹس ایپ بیٹا انفو’ کے مطابق یہ اختراعی فیچر اینڈرائیڈ کے بیٹا ورژن (2.26.37.8) میں دیکھا گیا ہے، تاہم یہ فی الحال بنیادی تیاری کے مرحلے میں ہے اور عام بیٹا ٹیسٹرز کے لیے بھی دستیاب نہیں کیا گیا۔

میٹا کی ملکیت واٹس ایپ کے اس نئے ٹول کے تحت چیٹ بار میں ایک مخصوص بٹن دیا جائے گا، جسے دباتے ہی اسکرین پر “Listening” (سن رہا ہے) کا اشارہ ظاہر ہوگا اور صارف کا بولا گیا پیغام فوری متن میں تبدیل ہو جائے گا۔ اس فیچر کی اہم بات یہ ہے کہ یہ انفرادی چیٹس، گروپس اور چینلز تمام جگہوں پر کام کرے گا اور وصول کنندہ کو صرف تحریری متن ہی موصول ہوگا۔ سیکیورٹی اور رفتار کو مدِنظر رکھتے ہوئے واٹس ایپ اس فیچر کے لیے ڈیوائس پر ڈاؤن لوڈ کردہ ‘لینگویج پیکس’ (Language Packs) استعمال کرے گا، جس کا مطلب ہے کہ ایک بار مطلوبہ زبان کا پیک انسٹال ہونے کے بعد صارفین فعال انٹرنیٹ کنکشن کے بغیر (آف لائن) بھی بول کر پیغامات لکھوا سکیں گے۔ واٹس ایپ نے فی الحال اس فیچر کے عمومی اجراء کی حتمی تاریخ کا اعلان نہیں کیا ہے۔