پائلٹ نے آسمان میں’مونا لیزا‘ بنا دی، 3 گھنٹے کی پرواز نے دنیا کو حیران کر دیا

امریکی ریاست آرکنساس میں ایک ماہر پائلٹ نے اپنی پرواز کی مہارت کو تخلیقی فن کے شاہکار میں بدل دیا۔ پائلٹ نے ‘سیسنا آر 182’ (Cessna R182) طیارے کے ذریعے تقریباً 3 گھنٹے تک مسلسل پرواز کرتے ہوئے لیونارڈو ڈا ونچی کی عالمی شہرت یافتہ پینٹنگ ’مونا لیزا‘ کا ڈیجیٹل سکیچ فضائی راستے پر تیار کر دیا۔

پائلٹ نے آرکنساس کے شہر بینٹن ویل سے پرواز کا آغاز کیا اور اوکلاہوما و آرکنساس کی سرحدی حدود میں پہلے سے ترتیب دیے گئے مخصوص جی پی ایس (GPS) روٹ پر طیارہ اڑایا۔ پرواز کے دوران طیارے کو انتہائی باریک بینی کے ساتھ مختلف سمتوں میں موڑا گیا، کیونکہ راستے میں ذرا سی غلطی بھی پورٹریٹ کی شکل بگاڑ سکتی تھی۔ اس منفرد پرواز کے نتیجے میں فلائٹ ٹریکنگ ویب سائٹس پر بننے والا نقشہ مونا لیزا کے چہرے، بالوں اور خدوخال سے بالکل مشابہ نظر آنے لگا۔

تقریباً 35 میل کے دائرہ کار پر محیط اس فضائی آرٹ کو فلائٹ ٹریکنگ پلیٹ فارمز پر 73 ہزار سے زائد افراد نے براہِ راست ٹریک کیا۔ سوشل میڈیا پر بھی مونا لیزا کے اس ڈیجیٹل سکیچ کی تصویریں اور ویڈیوز وائرل ہو گئیں، جسے صارفین نے جدید ٹیکنالوجی، فضائی مہارت اور فن کا ایک سحر انگیز امتزاج قرار دیا۔