فٹبال کھیلتے جنگلی ہاتھی کی ویڈیو سوشل میڈیا پر وائرل

بھارتی ریاست آسام کے ضلع گولہ گھاٹ کے علاقے نومالی گڑھ میں ایک جنگلی ہاتھی کی فٹبال کھیلتے ہوئے انتہائی دلچسپ ویڈیو سوشل میڈیا پر تیزی سے وائرل ہو گئی ہے۔ وائرل ہونے والی ویڈیو میں دیکھا جا سکتا ہے کہ ہاتھی ایک ہرے بھرے میدان میں موجود ہے اور بچوں کی طرح کبھی اپنے بھاری بھرکم پاؤں سے فٹبال کو کِک مارتا ہے تو کبھی اپنی سونڈ کی مدد سے گیند کو ہوا میں اچھال کر پھینکتا ہوا نظر آتا ہے۔

ہاتھی کے اس عجیب و غریب اور منفرد اندازِ کھیل کو دیکھنے کے لیے مقامی لوگوں کی بڑی تعداد میدان کے اطراف جمع ہو گئی۔ تاہم، کھیل کے دوران جیسے ہی جنگلی ہاتھی خوف یا مستی میں شہریوں کے قریب آنے لگتا، لوگ ڈر کے مارے پیچھے بھاگتے ہوئے دکھائی دیے اور دور سے ہی اس منظر سے لطف اندوز ہوتے رہے۔ سوشل میڈیا صارفین کی جانب سے اس ویڈیو کو بے حد پسند کیا جا رہا ہے اور لوگ ہاتھی کی مہارت پر مختلف دلچسپ تبصرے کر رہے ہیں۔

واضح رہے کہ اس سے قبل بھی بھارت میں ایک جنگلی ہاتھی کی سنسنی خیز ویڈیو وائرل ہوئی تھی، جس کی گردن میں ٹرک کا ایک بھاری ٹائر پھنس گیا تھا۔ اس وقت ریسکیو ٹیموں نے کئی گھنٹوں کی محنت کے بعد ایک بڑا آپریشن کر کے ہاتھی کو ٹائر سے نجات دلائی تھی اور محفوظ طریقے سے جنگل میں آزاد کر دیا تھا۔