کرایہ، اے آئی اور دنیا سے تنگ 100 سے زائد افراد سمندر کے سامنے چیخنے پہنچ گئے

امریکی ریاست کیلیفورنیا کے شہر سان فرانسسکو میں اپنی نوعیت کی ایک انتہائی انوکھی اور منفرد تقریب منعقد کی گئی، جہاں 100 سے زائد افراد نے روزمرہ زندگی کی جھنجھلاہٹ، کشیدگی اور ذہنی دباؤ سے نجات حاصل کرنے کے لیے ایک ساتھ پیسیفک اوشن (بحر الکاہل) کی جانب منہ کر کے زور زور سے چیخنا شروع کر دیا۔ ‘گٹرل اسکریم ایٹ دی سی’ (Guttural Scream at the Sea) کے نام سے منعقدہ اس تقریب نے مقامی شہریوں اور سوشل میڈیا کی توجه فوری طور پر اپنی جانب مبذول کروا لی۔

اس انوکھے ایونٹ کا انعقاد سان فرانسسکو کے سمندری ساحل ‘اوشن بیچ’ پر مقامی رہائشی ڈینیئل ایگن (Daniel Eagan) نے کیا۔ ان کا کہنا تھا کہ وہ خود کو شدید ذہنی تناؤ اور غصے کی کیفیت میں مبتلا محسوس کر رہے تھے اور انہیں اندر کا غصہ نکالنے کے لیے ایک زوردار چیخ کی ضرورت محسوس ہو رہی تھی، جس کے بعد انہوں نے خیال کیا کہ ان کی طرح شہر کے دیگر لوگ بھی یقیناً اسی قسم کی کیفیت سے گزر رہے ہوں گے، چنانچہ انہوں نے ایک اجتماعی تقریب کا اشتہار جاری کر دیا۔

تقریب کے لیے پوسٹ کیے گئے اشتہار اور دعوت نامے میں چیخنے کی مختلف دلچسپ و سنجیدہ وجوہات بیان کی گئی تھیں، جن میں شہر میں مکانات کے بڑھتے ہوئے کرائے، مصنوعی ذہانت (AI) کی وجہ سے پیدا ہونے والی جھنجھلاہٹ، روزمرہ کا غصہ اور محض ‘چیخنے کے بعد سکون اور اچھا محسوس ہونا’ شامل تھا۔ ساحل سمندر پر جمع ہونے والے افراد نے سمندر کی لہروں کے سامنے بیک وقت چیخیں مار کر اپنے جذبات کا اظہار کیا اور اسے ذہنی سکون حاصل کرنے کا ایک مثبت طریقہ قرار دیا۔