72 سالہ ملائیشین فٹبال لیجنڈ نے 20 سالہ لڑکی سے شادی کرلی

ملائیشیا کے سابق قومی فٹبال اسٹار داتوک عبدہ علیف نے 72 سال کی عمر میں خود سے 52 برس چھوٹی 20 سالہ لڑکی سے شادی کر لی ہے۔ ملائیشین میڈیا کے مطابق داتوک عبدہ علیف کی اس دوسری شادی کی تصدیق ان کے چھوٹے بھائی اور سابق قومی کوچ داتوک یونس علیف نے کی۔ ان کا کہنا تھا کہ یہ شادی 27 اگست کو دونوں خاندانوں کی مکمل رضامندی اور خوشی کے ساتھ انجام پائی اور اس رشتے میں کسی قسم کی رکاوٹ پیش نہیں آئی، جبکہ قریبی رشتہ داروں نے نو بیاہتا جوڑے کے لیے نیک خواہشات کا اظہار بھی کیا ہے۔

عبدہ علیف کی شادی کی تصاویر سوشل میڈیا پر وائرل ہونے کے بعد ان کے سابق ساتھی کھلاڑیوں نے بھی اس کی تصدیق کی ہے۔ داتوک عبدہ علیف ملائیشین فٹبال کی تاریخ کے معروف نام ہیں جنہوں نے 1970ء کے اواخر اور 1980ء کے اوائل میں ملائیشیا کے سنہری دور میں کلیدی کردار ادا کیا۔ وہ 1980ء کے ماسکو اولمپکس کے لیے کوالیفائی کرنے والی تاریخی ملائیشین ٹیم کے اہم رکن بھی رہے، اگرچہ بعد میں ملائیشیا نے ان کھیلوں کا بائیکاٹ کر دیا تھا۔