اطالوی شہری کے سامان سے مگرمچھ کا سر نکل آیا

ٹورین: اٹلی کے شہر ٹورین کے کیسلے ایئر پورٹ (Turin Caselle Airport) پر کسٹمز اور فنانشل پولیس حکام نے ایک اطالوی مسافر کے سامان سے معدومی کے خطرے سے دوچار نایاب مگرمچھ کا خشک سر برآمد کر کے ملزم کے خلاف باقاعدہ قانونی کارروائی شروع کر دی ہے۔

اطالوی فنانشل پولیس اسکواڈ کے مطابق مذکورہ مسافر امریکی شہر میامی سے براستہ استنبول اٹلی پہنچا تھا۔ ایئرپورٹ پر نایاب اور محفوظ شدہ جنگلی حیات کی غیر قانونی تجارت کی روک تھام کے لیے کی جانے والی خصوصی چیکنگ کے دوران مسافر کے بیگ سے مگرمچھ کا سر برآمد ہوا، جسے خشک کر کے عام پیکنگ پیپر میں لپیٹا گیا تھا تاکہ وہ روانگی والے ملک کے سیکیورٹی سکینرز اور چیکنگ سے بچ سکے

جرمانہ اور سزا: اطالوی حکام نے برآمد شدہ سر کو تحویل میں لیتے ہوئے مسافر کے خلاف بغیر ضروری اجازت نامے (Permit) کے محفوظ نوع کے جانور کے اعضاء اسمگل کرنے کے الزام میں مقدمہ درج کر لیا ہے۔ جرم ثابت ہونے کی صورت میں مسافر کو 20 ہزار سے 2 لاکھ یورو تک بھاری جرمانہ یا 6 ماہ سے 1 سال تک قید کی سزا کا سامنا کرنا پڑ سکتا ہے۔

واشنگٹن کنونشن: مگرمچھ ان عالمی جنگلی حیات میں شامل ہیں جنہیں 1973 کے واشنگٹن کنونشن (CITES) کے تحت مکمل قانونی تحفظ حاصل ہے۔ اس بین الاقوامی معاہدے کا بنیادی مقصد دنیا بھر میں کمیاب اور نایاب نسل کے پودوں اور جانوروں کی غیر قانونی خرید و فروخت اور اسمگلنگ کو روکنا ہے۔