سام سنگ کا اپنی دو ایپس بند کرنے کا فیصلہ

سیول: ٹیکنالوجی شعبے کی معروف عالمی کمپنی سام سنگ نے اپنی دو مقبول آگمنٹڈ ریئلٹی (اے آر) ایپس “اے آر ڈُوڈل” (AR Doodle) اور “کوئک میژر” (Quick Measure) کو مکمل طور پر بند کرنے کا باضابطہ فیصلہ کیا ہے۔

گلیکسی ایپ اسٹور پر جاری اپ ڈیٹ کے مطابق صارفین 31 دسمبر 2026 کے بعد ان دونوں ایپس کو اسٹور سے ڈاؤن لوڈ نہیں کر سکیں گے۔ سام سنگ نے نئے فلیگ شپ ماڈلز بشمول گلیکسی زیڈ فولڈ 8 میں ان ایپس کی سپورٹ پہلے ہی ختم کر دی ہے، جبکہ یہ تبدیلی آئندہ ون یو آئی 9 (One UI 9) سافٹ ویئر اپ ڈیٹ کے ساتھ مزید نمایاں ہو جائے گی۔

یاد رہے کہ ‘اے آر ڈُوڈل’ کیمرے کے ذریعے 3D ڈرائنگ اور ورچوئل اسکچنگ کی سہولت فراہم کرتی تھی، جبکہ ‘کوئک میژر’ فون کے کیمرے کی مدد سے کسی بھی چیز کا سائز اور فاصلہ ماپنے کے لیے استعمال کی جاتی تھی۔ کمپنی کے مطابق جن صارفین کے فونز میں یہ ایپس پہلے سے موجود ہیں، وہ اپنے موجودہ سافٹ ویئر ورژنز کی سپورٹ کے مطابق ان کا استعمال جاری رکھ سکیں گے۔