دوست کا ایک ہزار ڈالر کا تحفہ قسمت بدل گیا، امریکی شہری کروڑ پتی بن گیا

امریکی ریاست الینوائے کے شہر بریڈ ووڈ میں ایک شخص کی سالگرہ اس وقت زندگی کی یادگار ترین خوشی میں بدل گئی جب دوست کی جانب سے تحفے میں دیے گئے لاٹری ٹکٹس نے اسے کروڑ پتی بنا دیا۔ امریکی ذرائع ابلاغ کے مطابق اس خوش قسمت شخص کی اہلیہ نے سالگرہ کی تقریب کا اہتمام کیا تھا، جہاں ایک دوست نے اسے ایک لفافے میں لاٹری کے چند ٹکٹس تحفے میں دیے تھے۔ 8 اگست کی قرعہ اندازی میں اس ٹکٹ کے تمام نمبرز میچ کر گئے اور خوش نصیب شخص نے 10 لاکھ ڈالر (تقریباً 27 کروڑ پاکستانی روپے) کا جیک پاٹ جیت لیا۔

دلچسپ بات یہ ہے کہ لاٹری کا ٹکٹ چیک کرنے کے بعد اس شخص اور اس کے دوست کو شدید غلط فہمی ہوئی اور انہوں نے سمجھا کہ صرف ایک ہزار ڈالر کا انعام نکلا ہے، جس پر وہ دونوں بے حد خوش تھے۔ تاہم، جب میاں بیوی انعام کی رقم وصول کرنے لاٹری سینٹر پہنچے اور عملے کو بتایا کہ وہ ایک ہزار ڈالر کا کلیم جمع کروانے آئے ہیں، تو اہلکار نے مسکراتے ہوئے انکشاف کیا کہ ان کا انعام ایک ہزار نہیں بلکہ پورے 10 لاکھ ڈالر کا ہے۔ یہ سنتے ہی دونوں میاں بیوی حیرت اور خوشی سے رو پڑے، اور یوں دوست کا دیا گیا معمولی تحفہ ان کی زندگی کی سب سے بڑی دولت ثابت ہوا۔