امریکا: گاڑی میں چھپ کر 122 کلو میٹر کا سفر، بلونگڑا انجن سے بحفاظت نکال لیا گیا

امریکی ریاست ٹیکساس کے شہر کیروِل میں ایک حیران کن اور خوشگوار واقعہ پیش آیا ہے جہاں ایک نومولود بلی کا بچہ گاڑی کے انجن کے اندر پھنس کر تقریباً 122 کلومیٹر کا طویل اور خطرناک سفر طے کرنے کے باوجود معجزانہ طور پر بحفاظت ریسکیو کر لیا گیا۔ مقامی حکام اور ‘سٹی آف کیروِل’ کے مطابق پیٹرسن ہیلتھ کا ایک ملازم جب راکسپرنگز سے گاڑی چلا کر کیروِل میں اپنے ورک پلیس پر پہنچا تو اسے گاڑی کے انجن بے (Engine Bay) کے اندر سے آوازیں سنائی دیں۔ معائنے پر پتہ چلا کہ گاڑی کے بونس کے اندر ایک ننھا بلی کا بچہ موجود ہے جو مبینہ طور پر راکسپرنگز سے ہی گاڑی میں چھپ کر یہاں تک پہنچا تھا۔

اطلاع ملنے پر کیروِل اینیمل کنٹرول کے اہلکار اور ریسکیو گروپ ‘کیروِل پیٹس الائیو’ کی ٹیمیں فوراً موقع پر پہنچ گئیں۔ اسپتال کے عملے نے امدادی ٹیموں کے ساتھ مل کر بلی کے بچے کو بغیر کسی نقصان کے باہر نکالنے کے لیے گاڑی کی اگلی گرِل کو بڑی احتیاط سے ہٹایا، جس کے بعد اس نوزائیدہ بچے کو بحفاظت نکال لیا گیا۔ ریسکیو کے بعد اسے طبی معائنے اور ضروری دیکھ بھال کے لیے تحفظ مرکز منتقل کر دیا گیا ہے۔ 122 کلومیٹر کے شدید حرارت اور شور سے بھرپور سفر کے بعد اس ننھے مسافر کا محفوظ مل جانا ایک معجزہ قرار دیا جا رہا ہے۔