لندن میٹرو اسٹیشن پر چوہوں کی ’اسٹریٹ فائٹ‘، مسافر بھی رک کر تماشا دیکھنے لگے

لندن: برطانیہ کے دارالحکومت لندن کے مصروف ترین میٹرو اسٹیشنز میں سے ایک آکسفورڈ سرکس (Oxford Circus) کے پلیٹ فارم پر دو چوہوں کے درمیان ہونے والی دلچسپ ‘لڑائی’ نے مسافروں اور سوشل میڈیا صارفین کی توجہ حاصل کر لی ہے۔

سوشل میڈیا پر وائرل ہونے والی ویڈیو میں دیکھا جا سکتا ہے کہ آکسفورڈ سرکس انڈر گراؤنڈ اسٹیشن کے پلیٹ فارم پر دو ننھے چوہے کسی باکسنگ رنگ کی طرح ایک دوسرے پر جھپٹ رہے ہیں اور داؤ پیچ لگا رہے ہیں۔ مسافروں کی آمد و رفت کے باوجود دونوں چوہے ایک دوسرے کے ساتھ الجھنے میں مصروف رہے، جسے وہاں موجود شہری حیرت اور دلچسپی سے دیکھتے اور کیمروں میں محفوظ کرتے رہے۔

اس واقعے نے سال 2019ء کی اس مشہور وائلڈ لائف تصویر کی یاد تازہ کر دی ہے جس میں لندن ہی کے ایک ٹیوب اسٹیشن کے پلیٹ فارم پر دو چوہوں کو خوراک کے ایک چھوٹے سے ٹکڑے کے لیے آپس میں دست و گریبان ہوتے ہوئے کیمرے میں قید کیا گیا تھا۔ فوٹوگرافر سیم رولی کی ’اسٹیشن اسکوابل‘ (Station Squabble) نامی اس تصویر نے وائلڈ لائف فوٹوگرافر آف دی ایئر کا وائلڈ لائف پبلک چوائس ایوارڈ بھی جیتا تھا، جس میں ایک چوہا خوراک کا ٹکڑا حاصل کر کے فرار ہونے میں کامیاب رہا تھا۔