بھارت: بیٹی کے یاد کرنے پر باپ 14 گھنٹے کا سفر کر کے ملنے پہنچ گیا

نئی دہلی: سوشل میڈیا پر ایک بھارتی والد اور بیٹی کی محبت کی جذبات سے بھرپور کہانی نے وائرل ہو کر لاکھوں صارفین کے دل جیت لیے ہیں۔ انسٹاگرام پر متحرک خاتون کیولیا (@apple.kaivalya) نے ایک رات اپنے والد کو پیغام بھیجا کہ وہ انہیں یاد کر رہی ہیں، جس کے جواب میں والد اگلی ہی صبح 14 گھنٹے کا طویل سفر طے کر کے ان کے گھر کے دروازے پر پہنچ گئے۔

والد نے صرف اپنی بیٹی کے ساتھ تقریباً 8 گھنٹے کا وقت گزارنے کے لیے آنے جانے کا مجموعی طور پر 28 گھنٹے کا طویل سفر کیا۔ بیٹی کے مطابق تھکن کے باوجود والد نے آرام کرنے کے بجائے گھر کے کاموں اور برتن دھونے میں بیٹی کی مدد کی، اسے باہر گھمانے لے گئے اور اس کی پسندیدہ خوراک بھی کھلائی۔ اس دوران وہ اپنے دفتر اور کام سے متعلق فون کالز بھی نمٹاتے رہے۔

واپسی سے قبل والد نے بیٹی کو حوصلہ دیتے ہوئے کہا، “تم جو بھی کرو، بس خوش رہو، میں ہمیشہ تمہارے ساتھ ہوں۔” بیٹی نے اس لمحے کو سوشل میڈیا پر شیئر کرتے ہوئے لکھا کہ ان کے والد کسی بلاوے کے بغیر صرف یہ احساس دلانے آئے تھے کہ وہ دنیا میں کبھی اکیلی نہیں ہے۔ انٹرنیٹ صارفین نے اس واقعے کو والدین کی بے لوث اور غیر مشروط محبت کی سب سے بہترین مثال قرار دیا ہے۔