حج و عمرہ زائرین کیلیے گردن توڑ بخار کی ویکسین کا سرٹیفکیٹ لازمی، مصطفیٰ کمال

اسلام آباد: وفاقی وزیر صحت مصطفیٰ کمال نے انٹرنیشنل ٹریولرز ویکسینیشن سینٹر کا باقاعدہ افتتاح کر دیا ہے، جہاں بیرونِ ملک سفر کرنے والے اور پاکستان آنے والے بین الاقوامی مسافروں کو ایک ہی چھت تلے تمام ضروری حفاظتی ٹیکوں اور تصدیق ناموں کی سہولت میسر ہوگی۔

افتتاحی تقریب سے خطاب کرتے ہوئے وفاقی وزیر صحت نے کہا کہ بین الاقوامی سفر بالخصوص حج اور عمرہ پر جانے والے زائرین کے لیے گردن توڑ بخار (Meningitis) سمیت دیگر بیماریوں کی ویکسینیشن اور نادرا سے تصدیق شدہ سرٹیفکیٹ کا ہونا انتہائی ضروری ہے۔ انہوں نے بتایا کہ اس سینٹر کے قیام سے بیرونِ ملک جانے والے پاکستانیوں کو سفر سے قبل درپیش مشکلات کا سدِ باب ہو گا اور بین الاقوامی سیکیورٹی و صحت کے معیار کو یقینی بنایا جا سکے گا۔

تقریب کے دوران مصطفیٰ کمال نے سوشل میڈیا پر گردش کرنے والی اپنی ایک پرانی ویڈیو پر ہونے والی شدید تنقید کا جواب بھی دیا۔ انہوں نے وضاحت کرتے ہوئے کہا کہ ویڈیوز کو سیاق و سباق سے ہٹ کر پیش نہیں کیا جانا چاہیے۔ انہوں نے کہا کہ وہ ایک انسان ہیں اور کسی سانحے یا ہسپتالوں کی ابتر صورتحال پر غصہ یا جذباتی ہونا فطری امر ہے۔ انہوں نے اپنے سابقہ دورِ حکومت کی کارکردگی کا حوالہ دیتے ہوئے کہا کہ انہوں نے ماضی میں بھی عباسی شہید ہسپتال میں ایمرجنسی بیڈز کی تعداد بڑھائی اور بچوں کے لیے وینٹی لیٹرز فراہم کر کے عوامی خدمت کی مثال قائم کی۔