روس میں روبوٹ کی گاہک کو لات مارنے کی کوشش

ماسکو: روس کے ایک الیکٹرانکس سٹور میں گاہک کی جانب سے دھکا دیے جانے پر ہیومینائیڈ (انسان نما) روبوٹ کے غیر متوقع ردِعمل اور مبینہ طور پر لات مارنے کی عجیب و غریب ویڈیو سوشل میڈیا پر تیزی سے وائرل ہو گئی ہے۔

وائرل ہونے والی سی سی ٹی وی فوٹیج میں دیکھا جا سکتا ہے کہ سٹور میں موجود ایک شخص روبوٹ کے پاس جا کر اسے اچانک دھکا دیتا ہے۔ دھکا لگنے کے چند ہی لمحات بعد روبوٹ کا توازن بگڑتا ہے اور وہ اچانک اپنی ایک ٹانگ اس شخص کی طرف بڑھاتا ہے، جس سے بظاہر ایسا محسوس ہوتا ہے جیسے روبوٹ نے گاہک کو جوابی طور پر لات مارنے کی کوشش کی ہو۔ واقعے کے فوراً بعد وہاں موجود عملے نے مداخلت کی، اور رپورٹس کے مطابق روبوٹ کی حرکات پر قابو پانا مشکل ہونے کے بعد اسے پاور آف (بند) کر دیا گیا۔

سوشل میڈیا پر اس ویڈیو نے دلچسپ بحث اور تبصروں کا طوفان برپا کر دیا ہے، جہاں متعدد صارفین نے اسے مشہور سائنس فکشن فلم ’ٹرمینیٹر‘ سے تشبیہ دی۔ ماہرین کا کہنا ہے کہ یہ واضح نہیں ہے کہ آیا روبوٹ نے اپنا توازن برقرار رکھنے کے لیے خودکار میکانکی حرکت کی تھی یا اسے ریموٹ کنٹرول سے چلایا جا رہا تھا، تاہم انٹرنیٹ پر صارفین اسے اے آئی اور انسان کے درمیان بڑھتی کشمکش کا زبردست نمونہ قرار دے رہے ہیں۔