یومِ دفاع پر سائبر حملوں کا خدشہ، نیشنل سائبر ایمرجنسی رسپانس ٹیم کی اہم ہدایات

اسلام آباد: یومِ دفاع (6 ستمبر) کے موقع پر ممکنہ دشمن سائبر حملوں کے خدشے کے پیشِ نظر نیشنل سائبر ایمرجنسی رسپانس ٹیم (nCERT) نے ملک کے تمام اہم انفارمیشن انفراسٹرکچر اداروں، صوبائی و سیکٹورل سرٹس کو 5 سے 7 ستمبر تک خصوصی سائبر سکیورٹی کنٹرول روم قائم کرنے اور اعلیٰ الرٹ پر رہنے کی باضابطہ ہدایت جاری کر دی ہے۔

نیشنل سرٹ کی جانب سے جاری کردہ ہدایت نامے کے مطابق اس حساس عرصے کے دوران نیشنل سکیورٹی آپریشنز سینٹر (NSOC) 24 گھنٹے قومی سائبر رابطہ مرکز کے طور پر کام کرے گا اور ڈیجیٹل انفراسٹرکچر کو درپیش خطرات کی نگرانی سمیت اہم معلومات کا تبادلہ ممکن بنائے گا۔ اداروں کو ہدایت کی گئی ہے کہ وہ اپنے نیٹ ورکس، ویب سائٹس، ای میل سروسز اور ڈیجیٹل پورٹلز کی مسلسل نگرانی کریں اور کسی بھی مشتبہ سرگرمی یا سکیورٹی خلاف ورزی کی صورت میں فوری طور پر رپورٹ کریں۔

اس کے علاوہ سرکاری اداروں کو ویب ایپلیکیشن فائر وال (WAF)، ڈی ڈاس (DDoS) پروٹیکشن فعال کرنے، ملٹی فیکٹر آتھنٹیکیشن (MFA) لاگو کرنے اور غیر ضروری سروسز کو بند رکھنے کی تاکید کی گئی ہے۔ نیشنل سرٹ نے تمام اداروں کو اہم ڈیٹا کے آف لائن یا ایئر گیپڈ (Air-gapped) بیک اپ محفوظ رکھنے، ڈیزاسٹر ریکوری سائٹس کو فوری استعمال کے لیے تیار رکھنے اور ڈیٹا سینٹرز کے لیے متبادل پاور اور انٹرنیٹ کنیکٹیویٹی یقینی بنانے کی بھی ہدایت کی ہے تاکہ کسی بھی ناگہانی واقعے کی صورت میں ڈیجیٹل خدمات کی فوری بحالی ممکن ہو سکے۔