وزیراعظم کا پمز آتشزدگی پر ہنگامی اجلاس، غفلت کے مرتکب اہلکاروں کو رعایت نہ دینے کا فیصلہ

وزیراعظم شہباز شریف نے کرغزستان کے دورے سے واپسی پر شعبہ صحت اور پمز (PIMS) ہسپتال میں آتشزدگی کے واقعے سے متعلق اعلیٰ سطح کے ہنگامی اجلاس کی صدارت کی۔ اجلاس میں وفاقی وزیر صحت، وزیر اقتصادی امور اور پمز حکام نے شرکت کی، جہاں وزیراعظم کو عبوری تحقیقاتی رپورٹ اور فیصلوں پر عملدرآمد سے متعلق بریفنگ دی گئی۔ وزیراعظم شہباز شریف نے واضح کیا کہ مجرمانہ غفلت کے مرتکب اہلکاروں کو کسی صورت رعایت نہیں دی جائے گی۔ انہوں نے وفاقی وزیر صحت اور سیکریٹری صحت کو پمز کی مانیٹرنگ کے لیے متبادل دنوں میں وہاں اپنی موجودگی یقینی بنانے، ہسپتال میں علاج معالجے و حفاظتی انتظامات بہتر بنانے اور شعبہ صحت میں اصلاحات کا عمل مزید تیز کرنے کی سخت ہدایت کی۔