ہیرے بجلی پیدا کرسکتے ہیں، صدی پرانا سائنسی مفروضہ غلط ثابت

ہانگ کانگ: ایک صدی سے زائد عرصے سے قائم اس سائنسی مفروضے کے برعکس کہ ہیرا بجلی پیدا کرنے کی صلاحیت نہیں رکھتا، سائنسدانوں نے انتہائی پتلی اور لچکدار ہیرے کی جھلیوں (Membranes) میں مضبوط الیکٹرک اثر دریافت کر کے سائنس کی دنیا میں نیا انقلاب برپا کر دیا ہے۔

ہانگ کانگ یونیورسٹی (HKU) کے الیکٹریکل اینڈ کمپیوٹر انجینئرنگ کے ایسوسی ایٹ پروفیسر زیکن چو اور مکینیکل انجینئرنگ کے پروفیسر یوآن لن کی قیادت میں کی جانے والی اس جدید تحقیق نے یہ ثابت کیا ہے کہ ہیرا ایک ناپنے کے قابل ‘پیزو الیکٹرک’ (Piezoelectric) ردعمل پیدا کر سکتا ہے۔ 1900ء کی دہائی کے اوائل سے ہیرے کو نان پیزو الیکٹرک مواد سمجھا جاتا تھا، یعنی اس پر دباؤ ڈالنے یا موڑنے پر اس سے الیکٹرک وولٹیج پیدا ہونے کی توقع نہیں تھی۔

محققین کی ٹیم نے ایک جدید ‘ایکسفولیئشن’ طریقہ کار استعمال کرتے ہوئے پولی کرسٹل لائن ہیرے کو انتہائی باریک اور لچکدار جھلی میں تبدیل کیا۔ جب اس بے حد پتلی اور لچکدار ہیرے کی جھلی کو موڑا گیا تو سائنسدانوں نے اس سے مستحکم الیکٹرک وولٹیج سگنلز خارج ہوتے دیکھے۔ ماہرین کے مطابق یہ غیر متوقع سائنسی پیش رفت مستقبل میں ہیرے سے چلنے والے حساس سینسرز، نینو انرجی سسٹمز اور خودکار طبی امپلانٹس (Self-powered Medical Implants) کی ساخت میں کلیدی کردار ادا کرے گی۔