ایک لاکھ فٹ کی بلندی سے گرنے کے باوجود آئی فون 17 پرو محفوظ، عالمی ریکارڈ قائم کر لیا

کیرونا/کیلیفورنیا: ایپل کے جدید ترین آئی فون 17 پرو نے ایک حیران کن اور غیر معمولی تجربے کے دوران 1 لاکھ فٹ سے زائد کی بلندی سے زمین پر گرنے کے باوجود مکمل محفوظ رہ کر گنیز ورلڈ ریکارڈ قائم کر دیا ہے۔

موبائل ایکسیسریز بنانے والی معروف کمپنی ‘رائنو شیلڈ’ (RhinoShield) کے مطابق انہوں نے اپنے نئے ‘ایئر ایکس فون کیس’ کی پائیداری کو آزمانے کے لیے آئی فون 17 پرو کو ایک خلائی غبارے (Space Balloon) کے ذریعے سویڈن کے شہر کیرونا سے فضا کی بلند ترین سطح اسٹریٹوسفیئر (Stratosphere) میں بھیجا۔ فون کو 100,418 فٹ (تقریباً 30,607 میٹر) کی بلندی سے گرایا گیا، جو عام مسافر طیاروں کی پرواز کی بلندی سے تین گنا زیادہ ہے۔ اس حیرت انگیز سفر کے دوران فون منفی 60 ڈگری سینٹی گریڈ کی شدید ترین سردی اور انتہائی کم درجہ حرارت میں تقریباً 25 منٹ تک آزادانہ گرتا رہا۔

تعجب کی بات یہ ہے کہ فون کو حادثے سے بچانے کے لیے نہ تو کوئی پیراشوٹ استعمال کیا گیا، نہ ہیٹر اور نہ ہی زمین پر لینڈنگ کے لیے کوئی خصوصی کشن موجود تھا۔ فون ایک دشوار گزار اور منجمد جھیل پر جا گرا، جہاں 5 گھنٹے کی سخت تگ و دو کے بعد سرچ اینڈ ریسکیو ٹیم نے اسے تلاش کیا۔ رائنو شیلڈ کے ترجمان کے مطابق فون کی اسکرین اور باڈی پر ایک خراش تک نہیں آئی اور وہ فوری طور پر آن ہو کر کال کرنے کے قابل بھی تھا، جسے دیکھ کر ماہرین بھی حیران رہ گئے۔