سانحہ پمز کی پارلیمانی تحقیقات: حکومت نے کمیٹی کیلئے تمام جماعتوں سے نام مانگ لئے

اسلام آباد: سانحہ پمز (PIMS) کی پارلیمانی سطح پر تحقيقات کے لیے حکومت نے اہم پیشرفت کرتے ہوئے مشترکہ پارلیمانی کمیٹی کی تشکیل کے لیے تمام سیاسی جماعتوں سے اراکین کے نام طلب کر لیے ہیں۔

پارلیمانی ذرائع کے مطابق قومی اسمبلی نے گزشتہ جمعہ کے روز سانحہ پمز کی شفاف تحقیقات کی غرض سے ایک مشترکہ پارلیمانی کمیٹی قائم کرنے کی قرارداد کثرتِ رائے سے منظور کی تھی، جس کے بعد کمیٹی کی باقاعدہ تشکیل کا عمل تیز کر دیا گیا ہے۔ حکومتی اقدامات کے تحت تمام پارلیمانی اور سیاسی جماعتوں سے ان کی متناسب نمائندگی کے لحاظ سے ناموں کی فہرست فراہم کرنے کی درخواست کی گئی ہے۔

ذرائع کا مزید کہنا ہے کہ جیسے ہی سیاسی جماعتوں کی جانب سے اراکین کے نام موصول ہوں گے، قومی اسمبلی سیکرٹریٹ کی جانب سے مشترکہ پارلیمانی کمیٹی کی تشکیل کا باقاعدہ نوٹیفکیشن جاری کر دیا جائے گا۔ یہ کمیٹی سانحہ پمز کے اسباب، انتظامی غفلت اور واقعے سے جڑے مختلف تمام پہلوؤں کا تفصیلی جائزہ لے کر اپنی رپورٹ ایوان میں پیش کرے گی۔