افسوسناک واقعے کے بعد سینیٹ قائمہ کمیٹی قومی صحت کا اجلاس پمز میں طلب

پاکستان انسٹیٹیوٹ آف میڈیکل سائنسز (پمز) ہسپتال میں بچوں کی المناک اموات کے معاملے پر سینیٹ کی قائمہ کمیٹی برائے قومی صحت کا اجلاس  پمز ہسپتال کے کانفرنس روم میں طلب کر لیا گیا ہے۔ سینیٹ سیکرٹریٹ کی جانب سے جاری کردہ باقاعدہ نوٹس کے مطابق، سینیٹر عامر ولی الدین چشتی کی صدارت میں دوپہر 12 بجے ہونے والے اس اجلاس کے ایجنڈے میں بچوں کی اموات کا معاملہ ہی واحد نکتہ ہوگا۔ اجلاس میں پمز حکام کمیٹی کو سانحے کے حوالے سے بریفنگ دیں گے جبکہ کمیٹی ارکان ہسپتال کے طبی پروٹوکولز، مریضوں کی حفاظت اور انتظامی خامیوں کا جائزہ لیں گے۔ اجلاس کے بعد کمیٹی کے ارکان جائے سانحہ کا دورہ بھی کریں گے اور ذمہ داروں کے تعین و مستقبل میں ایسے واقعات کی روک تھام کے لیے سفارشات مرتب کی جائیں گی۔