ٹک ٹاکر شیروں کے پنجرے میں کود گیا؟ حیران کن ویڈیو وائرل

لاہور: لاہور چڑیا گھر میں ایک ٹک ٹاکر کی جانب سے مبینہ طور پر شیروں کے انکلوژر میں داخل ہونے کی ویڈیو سوشل میڈیا پر وائرل ہونے کے بعد چڑیا گھر انتظامیہ نے معاملے کی اعلیٰ سطحی تحقیقات شروع کر دی ہیں۔

سوشل میڈیا پر وائرل ہونے والی کلپ میں دیکھا جا سکتا ہے کہ ایک ٹک ٹاکر شیروں کی حفاظت کے لیے لگائے گئے بیرونی جنگلے کو پھلانگ کر اندر داخل ہوتا ہے اور چند سیکنڈز بعد واپس باہر آ جاتا ہے۔ اس خطرناک منظر پر شہریوں اور سوشل میڈیا صارفین نے شدید تشویش اور حیرت کا اظہار کرتے ہوئے چڑیا گھر کے سیکیورٹی انتظامات پر سوالات اٹھائے ہیں۔

دوسری جانب لاہور چڑیا گھر انتظامیہ نے واضح کیا ہے کہ شیروں کے بیرونی جنگلے اور ان کے اصل انکلوژر (خندق) کے درمیان کافی فاصلہ ہے جبکہ حفاظتی حدود پر ریزر وائرز کی متعدد تہیں بھی نصب کی گئی ہیں، جنہیں عبور کر کے کسی شخص کا شیروں کے بالکل قریب پہنچنا عملاً ناممکن ہے۔ انتظامی حکام کے مطابق ابتدائی جائزوں سے معلوم ہوتا ہے کہ ویڈیو میں ویژول ایفیکٹس یا ڈیجیٹل ایڈیٹنگ کا استعمال کیا گیا ہے، تاہم ویڈیو کی اصلیت اور حقیقت جاننے کے لیے تمام پہلوؤں سے تحقیقات جاری ہیں اور حتمی رپورٹ سامنے آنے پر قانونی کارروائی کی جائے گی۔