قدرتی آفات میں پھنسے افراد تک ادویات پہنچانے کیلئے سائبورگ کاکروچ تیار

سڈنی: آسٹریلیا کے سائنسدانوں نے قدرتی آفات اور ہنگامی حالات میں ملبے تلے دبے یا دور دراز علاقوں میں پھنسے افراد تک فوری طبی امداد اور ادویات پہنچانے کے لیے جدید ’سائبورگ کاکروچ‘ تیار کر لیے ہیں۔

غیر ملکی خبر رساں ادارے کی رپورٹ کے مطابق ‘پیرا بورگز’ (Para-Borgs) کا نام پانے والے ان الیکٹرانک کاکروچز کو خصوصی مائیکرو کیمروں اور انجیکشن کے آلات سے لیس کیا گیا ہے۔ محققین نے کاکروچز کے اعصابی نظام (Nervous System) میں چھوٹے الیکٹروڈز نصب کیے ہیں، جس کی مدد سے ان کی حرکات و سکنات اور سمت کو دور بیٹھے وائرلیس طریقے سے کنٹرول کیا جا سکتا ہے۔

سائنسی ٹیم کا کہنا ہے کہ یہ حیاتیاتی و ٹیکنالوجیکل شاہکار انتہائی تنگ، دشوار گزار اور تباہ شدہ عمارتوں کے دراڑوں سے گزر کر متاثرہ افراد تک آسانی سے پہنچ سکتے ہیں۔ ابتدائی تجربات اور لیبارٹری ٹیسٹنگ کے دوران ان سائبورگ کاکروچز کے ذریعے کامیابی سے دوا پہنچانے کی شرح 72 فیصد جبکہ قریبی فاصلے پر یہ شرح 95 فیصد تک ریکارڈ کی گئی۔ سائنسدانوں کو امید ہے کہ مستقبل قریب میں زلزلوں، عمارتیں گرنے، سانپ کے کاٹنے اور دیگر ہنگامی واقعات میں یہ سائبورگ کاکروچز انسانی جانیں بچانے میں کلیدی کردار ادا کریں گے۔