نیپال و تبت میں سیلاب سے ہلاکتیں 626 ہو گئیں، 2000 سے زیادہ افراد تاحال لاپتہ

کاتمنڈو: نیپال اور تبت میں آنے والے تباہ کن سیلاب اور لینڈ سلائیڈنگ کے نتیجے میں ہلاکتوں کی مجموعی تعداد بڑھ کر 626 ہو گئی ہے، جبکہ 2 ہزار سے زائد افراد تاحال لاپتہ ہیں جن کی تلاش کے لیے بڑے پیمانے پر سرچ اینڈ ریسکیو آپریشن جاری ہے۔

صورتحال کی سنگینی کو دیکھتے ہوئے نیپال نے ابتدا میں غیر ملکی ٹیموں سے انکار کے بعد اپنا فیصلہ واپس لیتے ہوئے خصوصی بین الاقوامی امداد کی اپیل کر دی ہے۔ نیپالی حکام کے مطابق سرنگوں میں پھنسے افراد کو نکالنے، لاشوں کی شناخت کے لیے ڈی این اے (DNA) ٹیسٹنگ ماہرین اور لاشوں کو محفوظ رکھنے کے لیے کولڈ اسٹوریج کی شدید ضرورت ہے۔ تباہ شدہ پلوں اور مواصلاتی نظام کے باعث متاثرہ علاقوں تک رسائی میں سخت مشکلات کا سامنا ہے، جبکہ سیلابی ریلوں میں بہہ جانے والی لاشیں دور دراز علاقوں سے مل رہی ہیں۔

امدادی کارروائیوں کو تیز کرنے کے لیے 15,000 سے زائد سیکیورٹی اہلکار اور مزید 1,200 فوجی جوان تعینات کر دیے گئے ہیں۔ دوسری جانب، لینڈ سلائیڈ کے باعث بننے والی ایک عارضی جھیل سے پانی کے امکان کے پیشِ نظر چینی ماہرین صورتحال پر گہری نظر رکھے ہوئے ہیں۔ بھارت، چین، امریکہ، برطانیہ، جاپان، جنوبی کوریا، سری لنکا اور بنگلہ دیش سمیت متعدد ممالک نے اپنے ریسکیو دستے بھیجنے کی درخواست کی تھی، جس کے بعد جنوبی کوریا نے اپنی ڈیزاسٹر ریلیف ٹیم روانہ کرنے کا اعلان کیا ہے۔