وفاقی وزیر احد چیمہ کی ڈریپ کو ادویات کی قیمتوں کا فارمولہ ازسرِنو مرتب کرنے اور ہارڈشپ پالیسی میں تبدیلی کی ہدایت

اسلام آباد: وفاقی وزیر برائے اقتصادی امور و اسٹیبلشمنٹ ڈویژن سینیٹر احد خان چیمہ نے ادویات کی قیمتوں میں اضافے کے موجودہ فارمولے پر عدم اطمینان کا اظہار کرتے ہوئے ڈرگ ریگولیٹری اتھارٹی آف پاکستان (DRAP) کو قیمتوں کے تعین کا طریقہ کار اور ہارڈشپ پالیسی ازسرِنو مرتب کرنے کی ہدایت جاری کر دی ہے۔

سینیٹر احد چیمہ کی زیرِ صدارت انعقاد پذیر اعلیٰ سطح کے اجلاس میں سیکریٹری صحت محمد محمود، سی ای او ڈریپ ڈاکٹر عبید اللہ، ڈائریکٹر پرائسنگ اور دیگر سینئر حکام نے شرکت کی۔ اجلاس میں ادویات کی قیمتوں کے تعین، درآمد کنندگان اور ریٹیلرز کے پرافٹ مارجنز اور ڈریپ پالیسی بورڈ کی یکسر تبدیلی سمیت اہم معاشی و ریگولیٹری امور کا جائزہ لیا گیا۔

وفاقی وزیر نے ہدایت کی کہ ادویات کے ہارڈشپ رولز میں فوری تبدیلیاں لائی جائیں تاکہ حکومتی ٹیکس رعایت کا حقیقی فائدہ صارفین تک پہنچے۔ انہوں نے بعض کیسز میں 40 فیصد تک موجود ریٹیل اور امپورٹ مارجنز کو معقول بنانے کا طریقہ کار وضع کرنے کا حکم دیا۔ احد چیمہ نے ڈریپ پالیسی بورڈ میں ہیلتھ اکانومسٹ (Health Economist) اور پبلک ہیلتھ ماہرین کو شامل کرنے کی ہدایت کرتے ہوئے اوریجنیٹر برانڈز کے لیے آزادانہ چیک اینڈ بیلنس کا نظام قائم کرنے پر زور دیا۔

انہوں نے کہا کہ وزیراعظم شہباز شریف کی قیادت میں حکومت عوام کو سستی ادویات کی فراہمی اور فارماسیوٹیکل سیکٹر کے استحکام کے درمیان منصفانہ توازن قائم کرنے کے لیے پرعزم ہے۔