جاپانی وزیر اعظم کاکروچ کے مرنے پر اداس ہو گئیں

ٹوکیو: جاپان کی وزیراعظم سانائے تاکائچی نے اپنی سرکاری رہائش گاہ میں پیش آنے والے ایک دلچسپ اور مزاحیہ واقعے کا تذکرہ کرتے ہوئے بتایا ہے کہ وہاں انہیں کوئی بھوت تو نظر نہیں آیا، تاہم ایک کاکروچ ضرور دکھائی دیا جس کے خاتمے کے بعد انہیں عجیب سی اداسی اور تنہائی محسوس ہوئی۔

سوشل میڈیا پلیٹ فارم ‘ایکس’ (سابقہ ٹوئٹر) پر تفصیلی پوسٹس شیئر کرتے ہوئے جاپانی وزیراعظم نے اپنی سرکاری رہائش گاہ میں قیام اور وہاں کے ماحول کے بارے میں گفتگو کی۔ واضح رہے کہ 1900 کی دہائی میں پیش آنے والے پُرتشدد واقعات کے باعث اس تاریخی عمارت میں بھوتوں کی موجودگی سے متعلق افواہیں طویل عرصے سے گردش میں رہی ہیں۔

سانائے تاکائچی نے بتایا کہ جب انہوں نے پہلی بار رہائش گاہ میں کاکروچ دیکھا تو ان کی چیخ نکل گئی، تاہم دوبارہ جنم (Reincarnation) کے خیال کے باعث وہ اسے خود مار نہ سکیں۔ انہوں نے سوچا کہ وہ خود ہی چلا جائے گا، لیکن جب انہوں نے اپنے معاونین کو اس بارے میں بتایا تو عملے نے حفظانِ صحت کے پیشِ نظر کیڑے مار دوا کا استعمال کر کے اسے ختم کر دیا۔

وزیراعظم نے مزاحیہ انداز میں کہا کہ اگرچہ کاکروچ کے خاتمے سے انہیں سکون تو ملا، لیکن ساتھ ہی ایک عجیب سی اداسی اور تنہائی کا احساس بھی ہوا کیونکہ وہ رہائش گاہ میں ان کی واحد ‘مخلوق’ تھی جو اب باقی نہیں رہی۔