واٹس ایپ نے اکاؤنٹ سیکورٹی میں بڑی تبدیلیاں کر دیں

دنیا بھر میں 3 ارب سے زائد صارفین کی حامل پیغام رساں ایپلی کیشن واٹس ایپ نے اپنے اکاؤنٹس کی حفاظت اور فراڈ سے بچاؤ کے لیے 3 اہم سیکیورٹی اپ گریڈز متعارف کرا دیے ہیں۔ پہلی بڑی تبدیلی کے تحت ’ٹو اسٹیپ ویریفکیشن‘ کے روایتی 6 ہندسوں والے پن کوڈ کے بجائے اب حروف، نمبرز اور خصوصی کریکٹرز پر مشتمل زیادہ محفوظ اور طویل پاس ورڈ کا آپشن دیا جا رہا ہے۔ دوسری تبدیلی میں ’پاس کیز‘ (Passkeys) کے استعمال کو وسعت دیتے ہوئے صارفین کو بیک وقت متعدد پاس کیز (فنگر پرنٹ، فیس آئی ڈی یا اسکرین لاک) بنانے کی اجازت دی گئی ہے تاکہ اینڈرائیڈ اور آئی او ایس کے درمیان سوئچ کرنے والوں کو آسانی رہے۔ جبکہ تیسری تبدیلی کے تحت اینڈرائیڈ صارفین کو غیر محفوظ یا نامعلوم نمبروں کی کالز اٹھانے سے قبل کالر کے ملک اور مشترکہ گروپس کی اضافی معلومات فراہم کی جائیں گی تاکہ اسپام کالز کی پہچان آسان ہو سکے