لاہور میں غیر قانونی انٹرنیٹ سروس فراہم کرنے والا سینٹر پکڑا گیا

لاہور: پاکستان ٹیلی کمیونیکیشن اتھارٹی (پی ٹی اے) اور ایف آئی اے کارپوریٹ کرائم سرکل نے لاہور میں مشترکہ چھاپہ مار کر غیر قانونی طور پر انٹرنیٹ سروسز فراہم کرنے والے ایک نیٹ ورک کا بھانڈا پھوڑ دیا اور ایک شخص کو گرفتار کر لیا۔

ترجمان پی ٹی اے کے مطابق، پی ٹی اے زونل آفس لاہور اور ایف آئی اے کی ٹیم نے فیروز پور روڈ پر واقع کاہنہ نو کے علاقے میں کامیاب کارروائی کی۔ چھاپے کے دوران معلوم ہوا کہ مذکورہ ادارہ پی ٹی اے کے جائز لائسنس کے بغیر غیر قانونی طریقے سے شہریوں کو انٹرنیٹ کی سہولیات فراہم کر رہا تھا، جس سے قومی خزانے کو نقصان پہنچ رہا تھا۔

کارروائی کے دوران موقع سے 2 سسکو سوئچز، 5 جی پی او این (GPON) او ایل ٹیز، 19 پیچ کیبلز، 3 کیش میمو بکس اور 1 لیپ ٹاپ قبضہ میں لے لیا گیا۔ گرفتار فرد کے خلاف ایف آئی آر درج کر کے ایف آئی اے نے مزید قانونی و تفتیشی کارروائی شروع کر دی ہے۔

پی ٹی اے حکام کا کہنا ہے کہ غیر قانونی انٹرنیٹ سروسز کے خلاف کریک ڈاؤن کا مقصد ٹیکس چوری، آمدنی کی غلط رپورٹنگ اور غیر قانونی ٹیلی کام نیٹ ورکس کی روک تھام ہے۔ اتھارٹی نے عام شہریوں سے اپیل کی ہے کہ وہ صرف پی ٹی اے سے لائسنس یافتہ اور منظور شدہ ٹیلی کام آپریٹرز ہی کی خدمات حاصل کریں۔