پاکستان میں پہلی بار سماعت سے محروم افراد کیلئے اے آئی ترجمان متعارف

پاکستان میں سماعت سے محروم اور کم سننے والے افراد کو بااختیار بنانے اور اہم معلومات کی فوری فراہمی کے لیے اے آئی (AI) پر مبنی سائن لینگویج ترجمان ‘صلہ’ اور معاون نظام متعارف کرا دیا گیا ہے۔ یہ انقلابی پیشرفت پاکستانی ادارے ConnectHear نے یوفون کے تعاون سے “منصوبہ سنو” کے تحت تیار کی ہے۔ اس ٹیکنالوجی کا بنیادی مقصد عام بول چال اور ہنگامی اعلانات کو فوری طور پر پاکستانی اشاروں کی زبان (Pakistani Sign Language) میں تبدیل کرنا ہے۔ ابتدائی طور پر اس اے آئی ترجمان کو قدرتی آفات جیسے سیلاب اور زلزلوں کے دوران ہنگامی وارننگز پہنچانے کے لیے استعمال کیا جائے گا تاکہ صوتی اعلانات پر منحصر معلومات سے سماعت سے محروم افراد محروم نہ رہیں۔ علاوہ ازیں، اس نظام کو تعلیم، ملازمت اور ڈیجیٹل پلیٹ فارمز کے لیے بھی قابلِ رسائی بنانے پر کام جاری ہے۔