پمز میں سی ٹی کورونری اینجیوگرافی سہولت فعال نہ ہونے پر وزیراعظم کا نوٹس، انکوائری کمیٹی قائم

وزیراعظم شہباز شریف نے پاکستان انسٹیٹیوٹ آف میڈیکل سائنسز (پمز) اسلام آباد میں سی ٹی کورونری اینجیوگرافی کی سہولت فعال نہ ہونے کا سخت نوٹس لیتے ہوئے معاملے کی تحقیقات کے لیے اعلیٰ سطح انکوائری کمیٹی قائم کر دی ہے۔ سیکریٹری اسٹیبلشمنٹ ڈویژن کی سربراہی میں قائم یہ کمیٹی اس بات کا جائزہ لے گی کہ 2022ء سے تکنیکی صلاحیت موجود ہونے کے باوجود یہ سہولت کیوں بند رہی۔ انکوائری کے دوران کارڈیالوجی اور ریڈیالوجی شعبوں کی کارکردگی کے علاوہ اس پہلو کا بھی خاص طور پر تعین کیا جائے گا کہ آیا پمز سے مریضوں کو نجی تشخیصی مراکزلگاتار ریفر کیے جاتے رہے اور کیا کسی مخصوص نجی ادارے کو ترجیح دی گئی۔ وزیراعظم نے ہدایت کی ہے کہ عدم رابطہ کاری، بدانتظامی یا غفلت کے ذمہ دار افسران کا تعیّن کر کے رپورٹ فوری پیش کی جائے تاکہ قانونی کارروائی کی جا سکے۔