حکومت کیخلاف توہین عدالت کی درخواست دائر کرنے جا رہے ہیں: سہیل آفریدی

اسلام آباد: وزیراعلیٰ خیبرپختونخوا سہیل آفریدی نے اعلان کیا ہے کہ وہ وفاقی حکومت کی جانب سے عدالت کے احکامات کی مسلسل عدولی کے خلاف توہینِ عدالت کی باضابطہ درخواست دائر کرنے جا رہے ہیں۔

میڈیا نمائندوں سے گفتگو کرتے ہوئے وزیراعلیٰ نے حکمرانوں پر شدید تنقید کی اور کہا کہ موجودہ حکمران عدالتوں کے تصدیق شدہ فیصلوں کو تسلیم کرنے سے انکاری ہیں اور خود کو آئین و قانون سے بالاتر سمجھتے ہیں۔ انہوں نے کہا کہ آئین و قانون کی دھجیاں اڑانے والوں کو ہر صورت قانون کے کٹہرے میں لایا جائے گا۔

سہیل آفریدی نے مزید واضح کیا کہ اپوزیشن اور پاکستان تحریکِ انصاف کی جانب سے 27 ستمبر کے احتجاجی مارچ کی کال اپنی جگہ مکمل طور پر قائم ہے اور اس تاریخ پر تمام سیاسی قیادت اور اتحادی مکمل طور پر متفق ہیں۔

انہوں نے کہا کہ حکومت کا بائیکاٹ اور احتجاج ہمارا آئینی حق ہے اور اس سلسلے میں اپوزیشن جماعتوں کا ایک اہم مشاورتی اجلاس بھی طلب کیا گیا ہے جس میں آئندہ کی مکمل سیاسی حکمتِ عملی اور قانونی لائحہ عمل کو حتمی شکل دی جائے گی۔