پاکستان کی سفارتی کامیابی، اقوام متحدہ میں پانی سے متعلق قرارداد منظور

جنیوا میں اقوام متحدہ کی انسانی حقوق کونسل (UNHRC) نے محفوظ پینے کے پانی اور صفائی ستھرائی کے انسانی حق سے متعلق ایک اہم قرارداد اتفاقِ رائے سے منظور کر لی ہے، جس میں پاکستان کو بڑی سفارتی کامیابی ملی ہے۔ جرمنی اور سپین کی جانب سے پیش کی جانے والی اس قرارداد میں پاکستان کی مؤثر سفارتی کوششوں کے نتیجے میں پہلی بار “پانی کے سرحد پار تعاون” کا واضح حوالہ شامل کیا گیا ہے، جبکہ بھارت نے اس حوالے کو ختم کرنے کی کوشش کی تھی۔ کونسل کے 47 رکن ممالک نے اس قرارداد کو منظور کیا۔ اس موقع پر پاکستان کے فرسٹ سیکرٹری عدیل کھوکھر نے خطاب کرتے ہوئے دو ٹوک مؤقف اپنایا کہ جہاں پانی مشترکہ ہو، وہاں ذمہ داریاں بھی مشترکہ ہوتی ہیں اور یہ کسی ہمسایہ ملک پر کوئی احسان نہیں بلکہ مشترکہ ذمہ داری ہے۔ انہوں نے زور دیا کہ کوئی بھی بالائی دریا کا ملک پانی کو سیاسی دباؤ یا اثر و رسوخ کے آلے کے طور پر استعمال نہیں کر سکتا، بلکہ اسے باہمی تعاون کے اصولوں کے تحت چلایا جانا چاہیے۔