ایم ٹی آنر 25 کے مزید 3 پاکستانی کریو ارکان بھی وطن واپس روانہ

نائب وزیراعظم اور وزیر خارجہ اسحاق ڈار نے ایم ٹی آنر 25 کے مزید تین پاکستانی کریو ارکان کی بحفاظت وطن واپسی کا اعلان کر دیا ہے۔ عمران علی، حسین یوسف اور محمد یاسین ادیس ابابا سے کراچی پہنچ گئے ہیں جہاں وہ اپنے اہل خانہ سے دوبارہ ملیں گے۔ نائب وزیراعظم نے بتایا کہ ایتھوپیا میں تعینات پاکستانی سفیر نے ان تینوں ارکان سے ملاقات کر کے انہیں تمام ضروری سہولیات فراہم کیں، جبکہ حکومت نے وزیراعظم شہباز شریف کی قیادت میں تمام کریو ارکان کی واپسی کے لیے تمام ممکنہ اقدامات کیے۔ اسحاق ڈار نے اس دوران ایم ٹی آنر 25 کے تین پاکستانی کریو ارکان کے جاں بحق ہونے پر گہرے دکھ اور افسوس کا اظہار کرتے ہوئے لواحقین سے تعزیت کی۔ انہوں نے اس عزم کا اعادہ کیا کہ پاکستان سمندری راستوں، بحری کارکنوں کی سلامتی اور بحری قزاقی کے خلاف عالمی شراکت داروں کے ساتھ تعاون جاری رکھنے کے لیے پرعزم ہے۔