مریم نواز سے عمانی وزیر کی ملاقات، ”اپنی چھت، اپنا گھر“ منصوبے میں دلچسپی

وزیراعلیٰ پنجاب مریم نواز شریف سے عمان کے وزیر برائے ہاؤسنگ و اربن پلاننگ ڈاکٹر خلفان بن سعید بن مبارک الشویلی نے ملاقات کی، جس میں ہاؤسنگ اور اربن پلاننگ کے امور پر تفصیلی تبادلہ خیال کیا گیا۔ عمانی وزیر نے وزیراعلیٰ کو ‘ایو این ہیبی ٹیٹ سکرول آف آنر ایوارڈ’ ملنے پر مبارکباد دی اور حکومت پنجاب کے فلیگ شپ منصوبے ”اپنی چھت، اپنا گھر“ میں گہری دلچسپی کا اظہار کیا۔ مریم نواز شریف نے عمانی وفد کو بریفنگ دیتے ہوئے بتایا کہ صرف 18 ماہ میں اس منصوبے کے تحت 2 لاکھ سے زائد افراد کو 260 ارب روپے کے بلاسود قرضے جاری کیے جا رہے ہیں اور سوا لاکھ سے زائد خاندان اپنے گھروں میں منتقل ہو چکے ہیں۔ انہوں نے کہا کہ صرف 14 ہزار روپے کی آسان ماہانہ قسط کے باعث اس منصوبے کا ریکوری ریٹ 99 فیصد سے زائد ہے۔ عمانی وزیر نے منصوبے کی شفافیت اور کارکردگی کو سراہتے ہوئے کہا کہ بلاسود ہونے کی وجہ سے یہ ماڈل انتہائی شاندار ہے۔ ملاقات میں دونوں رہنماؤں نے باہمی تعاون کو مزید فروغ دینے پر بھی اتفاق کیا۔