پاکستان اور جرمنی کا تجارت، سرمایہ کاری اور کاروباری روابط بڑھانے پر اتفاق

وفاقی وزیر تجارت جام کمال خان سے پاکستان میں جرمن سفیر اینا لیپل نے ملاقات کی، جس میں دونوں ممالک کے درمیان تجارت، سرمایہ کاری اور کاروباری تعلقات کو مزید فروغ دینے پر اتفاق کیا گیا۔ ملاقات کے دوران جام کمال خان نے جرمن کمپنیوں کو پاکستان کے مختلف شعبوں میں سرمایہ کاری کی پرزور دعوت دی، جبکہ جرمن سفیر نے جی ایس پی پلس اسٹیٹس سے متعلق پاکستان کی اصلاحاتی پیش رفت کو سراہا۔ اس موقع پر رانا احسان افضل نے پاکستانی باسمتی چاول کے جغرافیائی شناخت (جی آئی) کا معاملہ بھی اٹھایا اور اس کے قانونی تحفظ کی اہمیت پر زور دیا۔ جرمن سفیر نے زراعت، فوڈ پروسیسنگ، ٹیکنالوجی اور مینوفیکچرنگ میں سرمایہ کاری کے وسیع مواقع کا ذکر کیا۔ وفاقی وزیر تجارت نے جرمن سفیر کو نومبر میں کراچی میں منعقد ہونے والی ’فوڈ ایگ 2026‘ میں شرکت کی دعوت دی، جسے جرمن سفیر نے خوش آئند قرار دیا، جبکہ جرمن سفیر نے بھی جام کمال کو اکتوبر کے آخر میں سیول میں ہونے والی ایشیا پیسیفک کانفرنس آف جرمن بزنس میں شرکت کی دعوت دی۔