میر رضا کیس: کمیشن نے سی پی ایل سی نمائندے اور تفتیشی افسر کے بیانات ریکارڈ کر لیے

میر رضا کیس کی انکوائری کے لیے جسٹس عمر سیال کی سربراہی میں قائم جوڈیشل کمیشن نے اپنی کارروائی مکمل کر لی ہے اور اسے رپورٹ جمع کرانے کے لیے 15 اکتوبر تک کی مہلت حاصل ہے۔ کمیشن کے آخری اجلاس میں سی پی ایل سی کے نمائندے کاشف افتخار اور تفتیشی افسر سراج لاشاری کے بیانات ریکارڈ کیے گئے، جہاں میر رضا کی گمشدگی، جائے وقوعہ، جیو فینسنگ، سی سی ٹی وی فوٹیجز اور تفتیش کے مختلف پہلوؤں پر تفصیلی سوالات کیے گئے۔ سی پی ایل سی نمائندے نے بتایا کہ ڈیجیٹل ریکارڈ اور جیو فینسنگ کے باوجود کوئی ٹھوس نتیجہ یا مشکوک رابطہ سامنے نہیں آ سکا۔ کمیشن نے تفتیشی افسر سے دفعہ 161 کے بیانات اور شواہد خراب ہونے پر سخت سوالات کیے، جبکہ کرپٹو ٹریڈنگ اور انیستھیسیا سے متعلق مزید تحقیقات کی بھی ہدایت کی۔ دورانِ سماعت کمیشن نے ایک ڈاکٹر کے بیان کو غیر معمولی اہمیت دینے پر برہمی کا اظہار کرتے ہوئے سپر میڈیکل بورڈ تشکیل دینے کے فیصلے پر غور کیا، اور خاندان کی ذاتی گفتگو سوشل میڈیا پر لیک ہونے پر مقدمہ درج کرنے کی ہدایت بھی جاری کی۔