بیوی کی واضح اور آزادانہ رضامندی کے بغیر خلع نہیں دی جاسکتی، سپریم کورٹ کا اہم تحریری حکم نامہ جاری

سپریم کورٹ نے جسٹس شاہد وحید کی سربراہی میں پانچ رکنی بینچ کا تحریری فیصلہ جاری کر دیا ہے جس میں قرار دیا گیا ہے کہ بیوی کی واضح اور آزادانہ رضامندی کے بغیر خلع نہیں دی جا سکتی۔ عدالت عظمیٰ کے حکم نامے کے مطابق تنسیخِ نکاح کی درخواست کو خاتون کی رضامندی کے بغیر خلع میں تبدیل کرنا غیر قانونی ہے، اور ظلم و زیادتی ثابت نہ ہونے پر عدالت خود خلع کا انتخاب نہیں کر سکتی کیونکہ خلع اور قانون کے تحت تنسیخِ نکاح الگ راستے ہیں جن کے مالی نتائج بھی مختلف ہیں۔ عدالت نے واضح کیا کہ غیر رضاکارانہ خلع کے ذریعے خاتون کو حق مہر سے محروم نہیں کیا جا سکتا۔ فیصلہ میں دو خواتین کے نکاحوں کی تنسیخ کو خلع کے بجائے ’شقاق‘ (شدید اور مسلسل ازدواجی اختلاف) کی بنیاد پر برقرار رکھا گیا، تاہم یہ بھی واضح کیا گیا ہے کہ معمولی جھگڑے یا عارضی علیحدگی شقاق کے لیے کافی نہیں، بلکہ اس کے لیے بامعنی مصالحت کی ناکامی اور عدالت کا مطمئن ہونا ضروری ہے۔ سپریم کورٹ نے خلع کی بنیاد پر حق مہر واپس کرنے یا چھوڑنے کی ہدایات کو کالعدم قرار دیتے ہوئے دونوں مقدمات میں نان نفقہ اور جہیز کے سامان سے متعلق فیصلے برقرار رکھے ہیں۔