ایپل کے ہوم پیڈ سے متعلق اہم معلومات سامنے آگئیں

ٹیک کمپنی ‘ایپل’ کی جانب سے ڈسپلے سے لیس ایک بالکل نئے اسمارٹ اسپیکر (جسے غیر رسمی طور پر ہوم پیڈ یا ہوم ہب کہا جا رہا ہے) کو رواں سال کے آخر میں متعارف کرائے جانے کا قوی امکان ہے۔

حال ہی میں جاری کیے گئے میک او ایس (macOS) کے بیٹا ورژن 26.7 کے کوڈ تجزیے سے اس ڈیوائس کی لانچنگ اور اس کے خصوصیات سے متعلق اہم اشارے سامنے آئے ہیں، تاہم کمپنی کی جانب سے اس کے حتمی نام کا باضابطہ اعلان ہونا ابھی باقی ہے۔

کوڈ کے معائنے سے معلوم ہوا ہے کہ یہ نیا اسمارٹ ڈسپلے ‘tvOS’ کے ایک ترمیم شدہ ورژن پر چلے گا، لیکن اس کا یوزر انٹرفیس (UI) اور ہوم اسکرین کا انداز بڑی حد تک ‘ایپل واچ’ سے مشابہ ہو گا۔ اس کی ہوم اسکرین پر ‘فیسز’ اور ‘فیس گیلری’ کے آپشنز دستیاب ہوں گے، جہاں صارفین مختلف ویجٹس، اسمارٹ اسٹیکس اور آئی فون ایپ ویجٹس کو اپنی مرضی کے مطابق شامل اور ترتیب دے سکیں گے۔

صارفین کی پرائیویسی کو مدنظر رکھتے ہوئے ڈیوائس میں ایک سیکیورٹی فیچر بھی شامل کیا جائے گا، جس کے تحت ذاتی نوعیت کے معلومات والے ویجٹس صرف اسی وقت اسکرین پر ظاہر ہوں گے جب صارف کا آئی فون ڈیوائس کے قریب موجود ہوگا۔

اطلاعات کے مطابق ایپل اس ڈیوائس کو دو مختلف ڈیزائنز اور ورژنز میں پیش کرنے کی تیاری کر رہا ہے؛ ایک ماڈل اسپیکر بیس کے ساتھ ٹیبل پر رکھنے کے لیے ہوگا، جبکہ دوسرا ماڈل دیوار پر نصب (وال ماؤنٹ) کرنے کے لیے ڈیزائن کیا گیا ہے۔