افغانستان کا کابل میں امریکی سفارتخانہ کھولنے کا مطالبہ، واشنگٹن کا صاف انکار

افغانستان کی طالبان حکومت کے وزیر خارجہ امیر خان متقی نے امریکہ سے کابل میں اپنا سفارت خانہ دوبارہ کھولنے اور ملک کے معدنی وسائل و بنیادی ڈھانچے میں سرمایہ کاری کرنے کا مطالبہ کیا ہے۔ ’دی نیویارک ٹائمز‘ کو دیے گئے انٹرویو میں انہوں نے کہا کہ ہم جنگ کے باب کو ختم سمجھتے ہیں اور اب باہمی احترام پر مبنی مثبت روابط کا نیا باب شروع کرنا چاہتے ہیں۔ انہوں نے واضح کیا کہ افغان عوام اپنی سرزمین پر کسی غیر ملکی فوج کی موجودگی قبول نہیں کریں گے، تاہم وہ امریکہ سمیت دیگر ممالک کے سرمائے کا خیرمقدم کرنے کے لیے تیار ہیں۔ انٹرویو کے دوران انہوں نے خواتین کی تعلیم اور حقوق پر عائد پابندیوں سے متعلق سوال کا واضح جواب دینے سے گریز کیا۔

دوسری جانب امریکی محکمہ خارجہ نے طالبان حکومت کے ساتھ تعلقات کی بحالی کا امکان مسترد کر دیا ہے۔ امریکی ترجمان نے موقف اختیار کیا کہ طالبان انسدادِ دہشت گردی کے وعدے پورے کرنے میں ناکام رہے ہیں اور ان سے بات چیت صرف امریکی مفاد کے تحت ہی کی جائے گی۔ واضح رہے کہ امریکی انخلا کے پانچ سال بعد بھی بین الاقوامی برادری یا اقوام متحدہ نے طالبان حکومت کو باضابطہ طور پر تسلیم نہیں کیا ہے