کانگو میں ایبولا وائرس کی وبا ہر 30 منٹ میں ایک جان لینے لگی: ڈبلیو ایچ او

اقوام متحدہ اور عالمی ادارہ صحت (ڈبلیو ایچ او) نے جمہوریہ کانگو میں تیزی سے پھیلنے والی ایبولا وبا کی سنگین صورتحال پر شدید تشویش کا اظہار کرتے ہوئے عالمی برادری سے فوری اور مؤثر امدادی اقدامات کی اپیل کی ہے۔ اقوام متحدہ کے انڈر سیکرٹری جنرل برائے انسانی امور ٹام فلیچر نے ہنگامی انتباہ جاری کرتے ہوئے بتایا کہ یہ وائرس ہر 30 منٹ میں ایک انسان کی جان لے رہا ہے، جو ریکارڈ پر اب تک کی سب سے تیزی سے پھیلنے والی ایبولا وبا بن چکی ہے۔

ڈبلیو ایچ او کے مطابق یہ وبا ‘بنڈی بوگیو ایبولا وائرس’ کی قسم سے پھیلی ہے، جو ابتدائی طور پر صوبہ اِٹوری کے مونگبالو ہیلتھ زون تک محدود تھی تاہم اب 6 صوبوں کے 54 ہیلتھ زونز تک پھیل چکی ہے۔ جمہوریہ کانگو کی وزارتِ مواصلات کے مطابق متاثرہ علاقوں میں تصدیق شدہ کیسز کی مجموعی تعداد 4,727 تک پہنچ گئی ہے جبکہ 2,214 افراد لقمہ اجل بن چکے ہیں، جس کے ساتھ ہی کیسز میں اموات کی شرح (Fatality Rate) 46.8 فیصد کی خطرناک سطح پر پہنچ گئی ہے