سعودی عرب میں قوانین کی خلاف ورزی پر 14 ہزار غیر ملکی گرفتار

سعودی عرب کے تمام علاقوں میں کی جانے والی مشترکہ سیکیورٹی کارروائیوں کے دوران 6 سے 12 اگست کے عرصے میں اقامہ، لیبر اور بارڈر سیکیورٹی قوانین کی خلاف ورزی کرنے پر 14 ہزار سے زیادہ افراد کو گرفتار کر لیا گیا ہے۔ سعودی وزارتِ داخلہ کے مطابق گرفتار شدگان میں سے 7,216 افراد اقامہ قانون، 3,843 بارڈر سیکیورٹی اور 3,483 افراد لیبر قوانین کی خلاف ورزی میں ملوث پائے گئے۔ اس کے علاوہ سرحد سے غیر قانونی طور پر داخلے کی کوشش پر 1,457 افراد اور مملکت سے باہر جانے کی کوشش کرنے والے 19 افراد کو بھی حراست میں لیا گیا ہے۔

وزارتِ داخلہ نے بتایا کہ غیر قانونی طور پر داخل ہونے والوں میں 67 فیصد ایتھوپیائی، 32 فیصد یمنی اور 1 فیصد دیگر ممالک کے شہری شامل ہیں۔ سیکیورٹی فورسز نے ان تارکین کو رہائش، ٹرانسپورٹ اور ملازمت کی سہولیات دینے والے 22 افراد کو بھی حراست میں لیا ہے، جبکہ قانونی طریقہ کار مکمل ہونے کے بعد 12,945 مخالفت کرنے والوں کو اب تک ملک بدر (ڈی پورٹ) کیا جا چکا ہے۔