یمن میں 48 گھنٹوں کے دوران 200 سے زائد حوثی باغی ہلاک ہو گئے

یمن میں گزشتہ 48 گھنٹوں کے دوران فورسز کی کارروائیوں، جھڑپوں اور ڈرون حملوں میں 200 سے زائد حوثی باغی ہلاک ہو گئے ہیں۔ عرب میڈیا کے مطابق زیادہ تر ہلاکتیں جنوب مغربی صوبے تعز میں پیش آئیں، جسے حالیہ کشیدگی کے بعد سے حوثیوں کا اب تک کا سب سے بڑا جانی نقصان قرار دیا جا رہا ہے۔ ذرائع کا کہنا ہے کہ ہلاک ہونے والوں کی اکثریت کا تعلق نام نہاد ’الصمد بریگیڈ‘ سے تھا، جبکہ حوثیوں کے زیرِ کنٹرول دارالحکومت صنعا کے ہسپتالوں میں بڑی تعداد میں لاشیں منتقل کی گئی ہیں۔

یمنی میڈیا کے مطابق حوثی ملیشیا نے تعز میں دوبارہ کارروائیاں شروع کرنے کے لیے تازہ دم دستے اور کمک بھیج دی ہے۔ جنگجوؤں کی شدید کمی کو پورا کرنے کے لیے حوثیوں نے اپنے زیرِ تسلط علاقوں کی جیلوں سے سنگین جرائم اور منشیات کے کیسز میں ملوث 850 سے زائد قیدیوں کو رہا کر دیا ہے، جبکہ صوبہ ذمار سے مزید 1,400 قیدیوں کو اس شرط پر رہائی دینے کی تیاریاں جاری ہیں کہ وہ محاذِ جنگ پر جا کر لڑائی میں حصہ لیں گے۔