آبنائے ہرمز میں تیل کے اخراج سے ماحولیاتی نقصان کھربوں ڈالر ہو سکتا ہے: ایران

ایرانی وزارتِ خارجہ کے ترجمان اسماعیل بقائی نے خبردار کیا ہے کہ آبنائے ہرمز، خلیج فارس اور بحیرہ عمان میں تیل کے اخراج اور آلودگی کے باعث خطے کے سمندری ماحولیاتی نظام کو اب تک کھربوں ڈالر کا نقصان پہنچ چکا ہے۔ سوشل میڈیا پلیٹ فارم ایکس (X) پر جزیرہ قیشم کے قریب تیل کے رساؤ کی ویڈیو جاری کرتے ہوئے انہوں نے اس واقعے کا ذمہ دار ایک غیر ملکی جہاز کو قرار دیا اور کہا کہ تجارتی بحری آپریشنز سے فائدہ اٹھانے والے تمام فریقین کو اس آلودگی کو صاف کرنے کی قانونی و اخلاقی ذمہ داری قبول کرنا ہوگی۔

واضح رہے کہ مئی میں بحیرہ اسود سے روانہ ہونے والے 247 میٹر طویل تیل بردار بحری جہاز ’کیرولین بیزنگی‘ پر 8 جون کو دھماکے کی اطلاع ملی تھی، جس کے بعد یہ عمان کے صوبہ ظفار میں الحلانیات جزائر کے قریب پھنس گیا تھا۔ جہاز سے مسلسل تیل کے رساؤ نے عمان کی 12 کلومیٹر طویل ساحلی پٹی کو شدید متاثر کیا ہے، جبکہ اس کے اثرات اب ارد گرد کے دیگر سمندری علاقوں اور جزائر تک بھی پھیل رہے ہیں۔