عراق میں بس اور ٹرک میں تصادم، 7 سیاح جاں بحق، 23 زخمی

عراق کے شمالی صوبے نینوا میں سیاحوں سے بھری بس اور ٹرک کے درمیان شدید تصادم کے نتیجے میں 7 سیاح جاں بحق جبکہ 23 افراد شدید زخمی ہو گئے ہیں۔ پولیس حکام کے مطابق یہ خوفناک حادثہ صوبے کے جنوبی حصے میں مرکزی شاہراہ پر اس وقت پیش آیا جب بس دارالحکومت بغداد سے سیاحوں کو لے کر موصل کی جانب جا رہی تھی۔ تصادم اتنا شدید تھا کہ بس سڑک پر الٹ گئی۔

مقامی سیکیورٹی ذرائع کا کہنا ہے کہ بیشتر زخمیوں کی حالت تشویشناک ہے جنہیں امدادی ٹیموں نے فوری طور پر قریبی ہسپتالوں میں منتقل کر دیا ہے۔ حکام نے حادثے کی اصل وجوہات معلوم کرنے کے لیے باقاعدہ تحقیقات کا آغاز کر دیا ہے، جبکہ حادثے میں بچ جانے والے چند زخمی مسافروں نے بتایا کہ ڈرائیور کو دورانِ سفر بار بار اونگھ اور نیند کے جھونکے آ رہے تھے۔