سعودی عرب میں بدھ تک شدید گرمی، درجہ حرارت 50 ڈگری تک پہنچنے کی پیشگوئی

سعودی عرب کے قومی مرکزِ موسمیات نے خبردار کیا ہے کہ مملکت میں بدھ کے روز تک شدید گرمی کی لہر کا سلسلہ جاری رہے گا، جس کے دوران بعض علاقوں میں درجہ حرارت 50 ڈگری سینٹی گریڈ تک پہنچنے کا امکان ہے۔ رپورٹ کے مطابق گرمی کی اس لہر سے خاص طور پر الشرقیہ (مشرقی ریجن) کے علاوہ دارالحکومت ریاض کے مشرقی اور جنوبی علاقے شدید متاثر ہوں گے، جہاں زیادہ سے زیادہ درجہ حرارت 47 سے 50 ڈگری سینٹی گریڈ کے درمیان رہنے کی توقع ہے۔

قومی مرکز کے ترجمان حسین القحطانی کا کہنا ہے کہ موسمِ گرما کے آخری مہینے اگست کے دوران مملکت کے بیشتر حصوں میں درجہ حرارت معمول سے زیادہ رہے گا۔ دوسری جانب جازان، عسیر، الباحہ اور مکہ مکرمہ کے پہاڑی علاقوں میں گرج چمک کے ساتھ بارش اور ژالہ باری کا امکان ظاہر کیا گیا ہے، جبکہ تبوک، نجران اور مکہ مکرمہ ریجن میں گرد آلود تیز ہوائیں چلنے سے حدِ نگاہ متاثر ہو سکتی ہے۔ محکمہ موسمیات نے شہریوں اور رہائشیوں کو ہدایت کی ہے کہ وہ سرکاری ذرائع اور سوشل میڈیا اکاؤنٹس سے موسم کی صورتحال کے بارے میں آگاہ رہیں۔