یہودی آباد کاروں کا مسجد اقصیٰ میں زبردستی تلمودی رسومات ادا کرنے کے واقعات میں اضافہ

مقبوضہ بیت المقدس میں اسرائیلی پولیس کی سخت سیکیورٹی میں یہودی آباد کاروں کی جانب سے مسجد اقصیٰ کے صحنوں میں زبردستی داخل ہو کر تلمودی رسومات کی ادائیگی اور اشتعال انگیز دوروں میں شدید تیزی آ گئی ہے۔ مرکز اطلاعات فلسطین کے مطابق قابض اسرائیلی فوج اور پولیس نے اس دوران مسلمان نمازیوں کے داخلے پر سخت پابندیاں عائد رکھیں، بیرونی دروازوں پر شہریوں کے شناختی کارڈ ضبط کیے اور درجنوں افراد کو مسجد کے احاطے سے باہر نکال دیا۔ آباد کاروں نے جمعہ اور ہفتہ کے علاوہ روزانہ دو مرتبہ مسجد میں گھس کر عبادت کو معمول بنا لیا ہے۔

واضح رہے کہ دہائیوں پرانے بین الاقوامی قوانین اور ‘سٹیٹس کو’ (Status Quo) کے تحت مسجد اقصیٰ پر انتظامی کنٹرول اردن کی وزارتِ اوقاف کے ماتحت ‘ادارہ اسلامی اوقافِ یروشلم’ کے پاس ہے، اور یہ احاطہ صرف مسلمانوں کی عبادت کے لیے مخصوص ہے۔ 1994 کے اردن اسرائیل امن معاہدے کے تحت بھی اردنی شاہی خاندان کو ان مقدسات کا قانونی محافظ تسلیم کیا گیا ہے، جس کی خلاف ورزی کرتے ہوئے اسرائیلی فورسز غیر مسلموں کو وہاں مذہبی رسومات ادا کرنے کی کھلی اجازت دے رہی ہیں۔